ഒറ്റ മാവില്‍ 121 ഇനത്തിലുള്ള മാമ്പഴം കായ്ക്കുന്നതിനെ അദ്ഭുതം എന്നല്ലാതെ എന്തു വിളിക്കണം. ഉത്തര്‍പ്രദേശിലെ സഹാരന്‍പുരിലാണ് വിവിധയിനം മാങ്ങകളുണ്ടാകുന്ന ഈ മാവുള്ളത്.
പുതിയതരത്തിലും സ്വാദിലുമുള്ള മാമ്പഴങ്ങള്‍ ഉത്പാദിപ്പിക്കാനുള്ള ഗവേഷകരുടെ ശ്രമങ്ങളാണ് പതിനഞ്ച് കൊല്ലത്തോളം പ്രായമുള്ള ഈ മാവിനെ ഒരു മാന്തോട്ടമാക്കിത്തീര്‍ത്തത്.
മാമ്പഴങ്ങളുടെ പേരില്‍ നേരത്തേ തന്നെ പേരുകേട്ട സ്ഥലമാണ് സഹാരന്‍പുര്‍. അഞ്ച് കൊല്ലം മുമ്പാണ് പുതിയയിനം മാങ്ങകള്‍ ഉത്പാദിപ്പിക്കാനുള്ള പരിശ്രമങ്ങള്‍ ഗവേഷകര്‍ ജില്ലയിലെ കമ്പനി ബാഗ് പ്രദേശത്ത് ആരംഭിച്ചതെന്ന് സഹാരന്‍പുര്‍ ഹോര്‍ട്ടികള്‍ച്ചര്‍ ആന്‍ഡ് ട്രെയിനിങ് സെന്ററിന്റെ ജോയിന്റ് ഡയറക്ടര്‍ ഭാനു പ്രകാശ് റാം പറഞ്ഞു.
ജില്ലയിലുടനീളം മാംഗോ ഹോര്‍ട്ടികള്‍ച്ചര്‍ നടത്തിവരുന്നുണ്ട്. അതു കൊണ്ട് തന്നെ പുതിയ ഇനങ്ങളും ഇവിടെ വികസിപ്പിച്ചെടുക്കുന്നുണ്ടെന്ന് ഭാനു പ്രകാശ് റാം കൂട്ടിച്ചേര്‍ത്തു.
അഞ്ച് വര്‍ഷം മുമ്പ് അന്നത്തെ ജോയിന്റ് ഡയറക്ടറായിരുന്ന രാജേഷ് പ്രസാദാണ് 121 തരത്തിലുള്ള മാവിന്‍ശാഖകള്‍ ഒറ്റ മാവില്‍ ഗ്രാഫ്റ്റ് ചെയ്ത് യോജിപ്പിച്ചത്.
ഒരു മാവിന്റെ ശിഖരങ്ങളില്‍ വിവിധയിനം മാവുകളുടെ ശാഖകള്‍ ഗ്രാഫ്റ്റ് ചെയ്തായിരുന്നു പരീക്ഷണം. പിന്നീട് വൃക്ഷത്തെ പരിപാലിക്കാന്‍ ഒരു നഴ്സറിയെ ചുമതലപ്പെടുത്തി.
ഈ പരീക്ഷണം വിജയമായി, ഇപ്പോള്‍ മാവിന്റെ വിവിധ ശാഖകളില്‍ കായ്ക്കുന്നത് വിവിധയിനം മാമ്പഴങ്ങളാണ്. ഇത് സാധാരണക്കാര്‍ക്കും പ്രാപ്യമാണെന്ന് ഭാനു പ്രകാശ് റാം പറയുന്നു.
ദസ്സേരി,ലാംഗ്ര,ചൗന്‍സ, രാംകേല, അമ്രപാലി,ലഖ്നൗ സഫേദ,സഹാരന്‍പുര്‍ അരുണ്‍, സഹാരന്‍പുര്‍ വരുണ്‍, സഹാരന്‍പുര്‍ സൗരഭ്, സഹാരന്‍പുര്‍ രാജീവ്, സഹാരന്‍പുര്‍ രാജീവ്…തുടങ്ങി പ്രശസ്തമായ മാമ്പഴങ്ങളെല്ലാം ഈ മാവില്‍ കായ്ക്കുന്നുണ്ട്.
എന്നാല്‍ ഒറ്റമാവില്‍ ഏറ്റവുമധികം ഇനം മാമ്പഴം വികസിപ്പിച്ചെടുത്തതിന്റെ റിക്കാര്‍ഡ് പക്ഷെ ഇതിനല്ല. ഉത്തര്‍പ്രദേശിലെ മലിഹാബാദ് സ്വദേശിയായ ഹാജി കലിമുല്ലാ ഖാന്‍ ഒറ്റ മാവില്‍ 300 ഓളം വിവിധയിനം മാമ്പഴങ്ങള്‍ വികസിപ്പെടുത്തിരുന്നു.
പിന്നീട് ‘മാംഗോ മാന്‍’ എന്നറിയപ്പെട്ട ഇദ്ദേഹത്തിന് 2008ല്‍ രാജ്യം പദ്മശ്രീ നല്‍കി ആദരിക്കുകയും ചെയ്തു.
